Deepfakes a hlauhawm, fimkhur a ngai ta e Featured

Thiamna a sang zel a, kan inrin hmain hmanraw thar tha tak takin min run chho mek, thenkhat phei chu kan society-a harsatna min thlen thei khawpa hlauhawm an ni chho ta nawk mai. Hei kar hnih khat liamta mai atang khan khawvel titi chu DeepFakes a ni ta.

Photoshop hmanga hmel edit/lu thlak tih vel hi chu kan hmelhriatna a rei tawh, video a nih loh chuan ruak thlalak pawh, “A lem a niang,” kan ti mai thin. Video erawh edit a buaithlak a, sex tape lo leaked out a awm changin, “Anmahni ngei a nih hi,” kan ti hmak hmak thin kha a ni a, tunah chuan thil a danglam zo ta.

Video-a hmel (Face) awlsam taka thlak theihna software a rawn awm chho ta, mi kuthlei falte an che tan nghal chur chur mai. A software kalhmang leh an hman dan chu hetiang hian entirna siam ta ila :

‘Emma Watson hi film star lar a ni a, a hmel lanna thlalak hi internet-ah sang tam tak download tur a awm. Emma Watson-i hmel tam tak chu software-ah chuan an khungkhawm ta a, video footage an duh duhah a hmehbel ta thin a ni. Porn film-a hmeichhe hmelah te an han dah a, a ang em em mai bawk si, a tawng, chet dan leh a mitkhap dan thlengin Emma Watson tak tak nen danglamna a awm ta lo.’

He Software hi hman theih a nih atangin vawi nuai chuang kar hnih khat lek chhungin an download hem mai. He software hmanga an thil siamte chu DeekFakes an ti mai a, reddit website-ah vawm khawm a ni hlawm a, nimin mai khan reddit chuan chumi an vawmkhawmna page chu an la thla tawh nghe nghe a ni.

Hollywood-in an duhthala an siam ang maiin video quality tha tak pawh a awm nual. He software hi tunah rih chuan celebrity-te porn film siamsak nan an la hmang tlangpui a, Game of Thrones actresses Natalie Dormer te, Wonder Woman actress Gal Gadot te, film star Emma Watson te, Indian actress Priyanka Chopra te leh celebrity mi dang dang video an siam nghal nual a. Hei aia nasa pawh hian an la hmang chho dawn niin a lang.

Misual thenkhatin an huat zawng tihhmingchhiatna hmarua atan an la hmang chho zel dawn niin a lang a, facebook leh instgram velah kan hmel lanna kan upload nasa si, nakin lawkah chuan Mizo nulate sex tape hi an la rawn siam teuh ang tih pawh thil hlauhawm tak a ni tlat mai. Hmasawnna leh technology thar hi kan lo dang thei ngawt tawh bawk si lo, chuvang chuan mahni inven hi thil tha ber a ni.

(Thenkhat chuan hemi chungchang kan tarlang leh kan inhrilhhre ta hi thilsual intihhmuhna anga ngai an awm nawk ngei ang, chutih laiin global village a ni tawh a, internet-ah enge thil thleng thar kan chhiar zung zung thei tawh bawk si nen, kan tarlang emaw tarlang lo emaw, Mizote pawhin kan la hre tho tho dawn. Chuvang chuan mahni lo inven kha thil pawimawh tak a nih avang zawkin kan rawn thailang ta a nih hi)

Instagram leh facebook velah kan thlalak kan upload nasa si a, hei hi min tihhmingchhiat duhtu ten hmanraw tangkai taka an rawn hman theih dawn avangin heng social networking-a intarlan vak vak te hi a him ta lo kan ti thei awm e, chuta tang chuan engtia hma lak tur nge? Engtia inven tur nge? Tih mahni theuhin kan hre tawh mai ang chu.

Sex tape insiamsak mai hi a la ni dawn lo niin a lang. CCTV footage-ah pawh mi thilsual ti lai hmelah kan hmel an la bel zel thei dawn tlat. Tin, politics leh thil dang dangah he software hi hman khawloh a nih chhoh ngei a rinawm bawk a ni.

Khawngaihin Hriatna Facebook Page hi i lo LIKE ve dawn nia : Click Here

Facebook Comments

Tagged under:

Back to top