Inventor ropui Nikola Tesla Featured

Scientist ropui tak tak an awm, Albert Einstein te phei chu theory ropui tak a hmuhchhuah avangin vawiin thlengin Scientist zingah pawh ngaihsan hlawh lawr lak a ni. Mithiam tak tak ten thil an hmuhchhuah; mahse mihringin kan chhawr lem loh erawh a tam. Hetih lai hian Nikola Tesla erawh vawiina khawvel mipuite tan hi chuan a va hlu tak em!

Kum 1926 khan Nikola Tesla chuan “Wireless hi a nihna tur ang taka hman a nih hunah chuan khawvel pumpui hi kan la inthlunzawm anga, thluak lian tak ang a la ni dawn. Chu chu thil tithei tak a ni dawn bawk a, khawvel pang lehlam ami te nen pawh chhumlo chat lovin kan la inbe pawh thei ang.

“Phone hmanga inbiak chauh nilovin, Television hmang leh hmel inhmu ngeiin kan la inbe pawp ngei dawn bawk a ni. Hmun hlat zawngah a innghat dawn lo, hmanraw tha tak hmangin kan la inbe thei anga, iptea ah bo daih theih inbiakpawhna khawlte pawh an la rawn siam chhuak dawn a ni,” tiin a lo sawilawk daih tawh.

Kum 1926 velah kha chuan radio an hmang chho laih laih chauh kha a ni a, Tesla hi chuan a thil hmuhchhuah wireless transmission-in hna a thawh turu dan tur a lo hrethiam lawk vek tawh a ni. Tesla hi July ni 10, 1856 khan Austrian Empire (Croatia)-ah piangin a naupan tet ata naupang danglam leh fing tak a ni. Engineering lam zirin a thiam thei fal em em, beisei sang tak nena a chhung ten an thlir laiin lehkha zir ngaihtuah thei lek lovin sum inthapna lamah a inhmang ta. A zirlai pawh a chhuanzawm thei ta lova, America ramah pawisa pawh nei lovin a pem. Chutah chuan hna a thawk kual a, Thomas Edison-a nen an intawng fuh hlauh mai.

Thomas Edison vs Nikola Tesla

School zirlaibuah Tesla-a chanchin kan hre khat khawp mai, chutih laiin Thomas Edison erawh kan hmu hnem. Tun hnuah Edison leh Tesla inkar kan han hriat chian takah chuan mi tam takin Edison aiin Tesla an ngaisang ta zawk a. Historian tam takin an sawi danin Edison hi inventor a nih bakah sumdawng rilru pu tak a ni a, mi thil hmuhchhuahte pawh lei sak zel thei khawpa hausa leh ama hminga kaltir zel duh mi a ni an ti.

Hetih lai hian Tesla erawh thil hmuhchuah kawnga theihtawpa tang thin mi a ni a, Edison-a hnuaia a thawh laiin an karah buaina a chhuak ta. Edison-a company chuan New York khua hmun zau tak ti eng turin contract lian tak an hmu hlauh mai. Hrui te an zam a, street light te an han fit chho a, hetih lai hian Edison-a hmuhchhuah Direct Current chuan hrui a duh len bakah current kal vel a thleng tawi si, sum tam tak an sen phah nghe nghe.

Edison chuan an hnuaia thawk Nikola Tesla chu ngaihtuahna thar nei turin a ti a, an sum sen tam lutuk ti ziaawm turin engemaw hmuchhuak turin a ti. Hmasawnna lian tak an neih chuan an company hlawkna atangin 50,000 dollars (Tunlai a hlut zawng 1 million dollars vel a ni ang) pek a tiam. Tesla chuan a theihtawp a chhuah a, an hlawhtling ta reng, chutah Tesla chuan pawisa chu a dil ta a. Hetah hian Edison chuan American fiamthu mai a nih thu lo hrilhin pawisa chu a pe duh ta lo. Chutah Tesla chu a inpuchhuak ta a.

Westinghouse hnuaiah thawk chhunzawmin anni hian an lo duhsak em em a, thuneihna sang tak pawh an lo pe nghe nghe. Tesla chuan Alternating Current leh generator a hmuchhuak ta. Direct Current (DC) aiin a awlsam zawk bawk si nen, hmun hla tak tak thlengin power hlauh lovin current a kal thei ta tlat mai. Tesla-a AC leh Edison-a DC chu an inel chhunzawm ta a. Edison chuan Tesla-a AC chu a hlauhawm thu New York chanchinbuah a ziak ta chiam chiam mai, Tesla-a thil siamna hmun kawttuala ui leh zawhte te chu an thi ta pheuh pheuh bawk a. Edison chuan Tesla-a AC hlauhawm zia lantirnan mite ruaiin heng ui leh zawhte te hi an lo tihlum thin chu lo niin.

Tesla chuan AC chu a hlauhawm loh zia lantir nan amahah current kaltlang tirin light bulb a ti eng ta va mai le, hetah chiah hian AC chu a hlauhawm loh zia mipuiin an hre ta a, vawiin thlengin AC hi kan chhawr nasat zia chu sawi kher a ngai awm love.

Tesla tawpna Tower chu

Tesla hi sumdawng mi a ni lova, khawvel mihring tena an chhawr theih tur thil hmuchhuah chu a thupui ber a ni. Mipui ten electric eng a thlawna an dawn theihna tur project lian tak Tesla Tower a buaipui, he a thil tum hi a turu lutuk a, a hlawhtling nghal mai lo, sum a mamawh hnem em avangin sum lama tanpuina a mamawh, mahse puitu a nei ta si lo, a tlukchhiat phah ta a, a boral hian hotel-ah thia chhar a ni a, sum leh pai hnutchhiah a nei lova, rethei takin kum 86 mi niin January ni 7, 1943 khan New York Hotel-ah a boral ta a ni.

Tesla tower hi vawiin thlenga mite ngaihtuahna ti thuitu a la ni chhunzawm zel a. Khawvelin a thlawna electricity a pekchhuah hi a thlawna mipuiin an dawn theih nan hma a la. In chhunga a enchhinnaah wireless current a hlawhtling hle, hrui zam miah lovin electric bulb a eng pap pap thei, chutiang chu hmun zau zawk pekchhuah tumin Tesla Tower a buaipui a. A thih hnu hian a laboratory chu engtia kang nge tih hriat lovin a hnathawh leh lehkhabu chi hrang hrang chu a kang ral vek nghe nghe a ni.

Conspiracy theories phei chuan Tesla hian free electricity pek chhuah a tum laiin sumdawnnana hmang sawrkar ten hei hi an duh lova, chuvang chuan Tesla Tower pawh a hlawhtlin an hlau hle a, sum lamah an tanpui duh ta lo niin an sawi hial. School zirlaibua a inziah dan chuan Egypt rama pyramid lian te khu Pharo te thlan a ni, mahse tun hnua an han chhui chian chuan ruang zalhna an hmu hauh lo, a chhung an han bihchian phei chuan thenkhat chuan free electricity pekchhuahna tower lian niin an ngai hmiah mai. Tesla Tower leh pyramid te hi sawi zawm a ni fo nghe nghe a ni.

Tesla-a thil hmuhchhuah kan tangkapui em em te:

Alternating Current, Light (Tesla hian light chu a hmuchhuak chiah lo, mahse bulb siam danah hian vawiina kan hman hi a duan a ni), X-rays, Radio (Marconi hmuhchhuah nia ngaih ni mahse Tesla-a hmuhchhuah zul zuia Marconi hnathawh a ni mai zawk), Remote Control, Electric Motor, Robotics, Laser, Wireless Communications (Vawiina internet leh kan inbiakpawhna hi Tesla hmuhchhuah a ni e)

Limitless Free Energy erawh a hlawhtling ta lova, a chunga kan tarlan tawh ang khian kha a ngaihtuahna kha tihpuitlin theih ni ngeia ngai mi thiam tak tak an awm teuh mai, hetih lai hian vawiin thlengin he thil hi khawvel sawrkarin a buaipui chhunzawm ta lo a ni.

Facebook Comments
Back to top