Mayan khawpui hmuhchuah belh zel a ni e Featured


Maya hnam kut hnu ropuite chuan tunlai mithiamte lu a la tihai chhunzawm zel a, Maya ho hi kum 900 AD hnu atang khan an ropuina a chuai ta nia chhut a ni. An ropui vanglai hi 300 AD hunlai vel kha nia chhut a ni a, an awmna hmun hi Guatemala, Central America-ah niin thil siam ropui tak tak an hnutchhiah a, vawiin thlenga khawvelin mak a la tih chu an pyramid ropui siam leh lung banga an thil ker te chu an ni.

Mayan hnam hi an ropui vanglai chuan an khawpuiah hian mipui 50,00,000 chuang an cheng nia hriat a ni a, hetih lai hian kumin February thla tira mithiamte thil hmuhchhuah atang chuan mipui 1,50,00,000 chuang an khawpuiah hian an cheng niin a lang ta tlat mai. Mayan ho chenna hmun hi ramngaw chhah takin a bawh tawh a, hemi avang hian pyramid sang awm khawmna hmun bak chu hriat tak tak theih a ni lo. Tunah chuan thiamna thar nen ramhnuai 772 square miles-a zau chu an han endik a, in 60,000 chuang awm thinna hmun chu ramngaw hnuaiah chuan a lo inphum reng chu lo niin.

Khawvel hmun hrang hranga mi thiam Scientist leh archaeologist te chuan PACUNAM LiDAR (Light Detection and Ranging) khawl chu thlawhnaah an vuah a, 772 square miles-a zau ramhnuai chu an scan ta. Computer thiamna hmangin thing leh lei chunglang te chu an han nawt fai a, khawpui lian tak a lo inphum reng chu niin. He an thil hmuhchhuah hian History kan lo zir thinte pawh kha nasa takin a thlak danglam dawn niin a lang.

Ramhnuaia han vah vel mai chuan heng khawpui inphumte hi a hriat theih mai lohva, Mayan Civilazation chhuitu mithiam zinga pakhat Tom Garrison chuan, “Magic trick ang mai a ni. He kan thil hmuhchhuah hi kum 100 chhunga Maya archaeology chungchang chhuinaah chuan a pawimawh ber pakhat a ni tlat mai,” tiin a sawi. Pyramid liante chu khawpui chuan a lo hual vel chu a lo ni a, tuna an Scan chin hi a la zim viau a, zau zawk an scan leh hunah phei chuan kan beisei phak bak thil ropui hmuhchhuah a nih rin a ni.

Mayan ho hi hnam ropui tak ni mahse engtin nge an bo thut tih chu zawhna chhan theih loh a la ni chhunzawm zel a. Mi thiam thenkhat chuan khawkheng nasa lutuk avangin he hmun ropui hi an chhuahsan niin an ngai. Chu chu rindan tlanglawn ber a ni a, thenkhat chuan politics avangin hemi hmuna khawsa mipuite karah buaina a chhuak a, chu chu an rem phahna a ni an ti ve mek bawk. Engpawhnise History kan zirlaia inziakte chu thiamna a lo chankan zel avang leh hmuhchhuah thar a awm belh zel takah chuan siamthat ngai a la awm teuh dawn niin a lang ta.

Tuna damlai mihringte hian ziaka chanchin dahthat atanga kan chhut letin; kan hriat theih chin chu kum 5000 chhung vel lek a ni a, hetih lai hian 300 AD hunlai vela hnam ropui te pawh kan hre kim tak tak thei ta lo chu a ni a. Ni-a kan hriat tam tak hi a lo ni lo viau thei dawn tlat mai. Mihring thiamna hi a sang tawh hle nia kan ngaih lai hian kum 4 liamtaa Malaysian Airlines Flight 370 bo pawh kan la zawng hmu thei lo chu a ni a, Indian Ocean-ah a tla nia ngaih a nih laiin tuipui hnuaiah enge awm tih pawh kan la hre hleithei lo chu a nih hi.

Tunlai khawvel hi han thlir ila, mipui bitna hmun chu tuipui kam a ni zel ang. Mi thenkhat ten tuipui kam hnaih chhunga rohlu an zawnna lamah khawpui tuiin a chimpil tak te an hmuchhuak nawlh nawlh. Tuifinriat hian hmanlai civilization engzat tak maw khuh bo ang maw? Tunah hian a ‘then pawh kan hre thei lo, he luikam atang hian,’ an tih ang deuhin, kan history hi kan lo la hre tlem hle pawh a ni thei dawn tlat mai. Hmanlai thil hmuhchhuah tur hi a la tam dawn tak zet niin a lang, kan changkang zel anga, history thlak hlawk hlawk thei hmuhchhuah thar a la rawn awm zut dawn chiang a ni.

Khawngaihin Hriatna Facebook Page hi i lo LIKE ve dawn nia : Click Here

Facebook Comments

Tagged under:

Back to top