Nalh duh luatah kan hmel kan tichhe mai zawk em? Featured

20th Century tir lam khan ralthuam leh thiamna lamah khawvel nasa takin a thang. Hetih rual hian taksa mawina kawngah pawh nasa takin hma an sawn chho bawk a.

Radioactive elements Throium-Cloride leh Radium te chu cosmetic atan hman a ni chho a, French leh Germany lam atangin product an thawnchhuak nasa. Hmel a ti eng a, vun a ti lang naupang thei a ni awm e. Tho-Radia phei kha chu lar vet vet tak a ni.

Hetih lai hian heng product te hi radioactive elements tlem ni mahse mihringah chuan thil hlauhawm tak a lo thlen thei reng chu niin, thihpui pawh an awm nawk a, vun lama harsatna tawk chhunzawm pawh an tam hle nghe nghe a ni.

Tunlai hian Mizo nulate ngo chak tak tak an awm nual, khawchhak lam atanga chhuak product thenkhat ngona an tih ang chite phei chu hmang an thahnem hle. Hang ve tak nia kan ngaihte pawh thla hnih khat chhungin an lo ngo vuk thin.

Heng product thenkhat hi a him em? Tih hi chhut tham a ni a, enge an cosmetic product-ah chuan an pawlh? Tih pawh kan hrechiang mang si lo bawk nen. Korean product hi a him ti tawk an awm, a him turah ngai ila, chutih laiin Korean product anga rawn kaltirte pawh a awm nawk thei bawk.

Mipa te hian vun an sawisel tam lo, chutih laiin hmeichhe ho erawhin, “Kei chu ka vun hi a sensitive lutuk,” an ti tlangpui. Allergy vanga hetiang vun sensitive hi awm thei chu a ni chiang mai, hetih lai hian womenshealthmag.com-in a tarlan pakhatah chuan product chi hrang hrang hman hnem lutuk vanga awm thei a ni ve tlat mai.

Hmelthat/nalh leh mawi kan duh lutuk luatah hian kan hmel hi kan tichhe zo vek thei tih hria ila, naupan lai atanga makeup hman nasat te hi a that loh zia pawh hmuh theihin a awm reng a nia. Hmelthat i duh chuan i ei leh in fimkhur zawk la, tobacco product lam reng reng hnaih loh a pawimawh.

Facebook Comments

Tagged under:

Back to top