Ni (Sun)-ah satellite kap kai dawn Featured

August ni 12, 2018 (Pathianni) khan NASA chuan Ni (Sun) zirchiang turin satellite hlawhtling takin an kapchhuak. Pathianni zing lam khan niin Cape Canaveral, Florida atanga kahchhuah a ni a, khawvela rocket chak ber pakhat nia sawi Delta IV Heavy rocket chuan he khawl hi vanah a thlawhchhuahpui ta a ni.

Rocket hmanga satellite an kahchhuah hi car tiat lek a ni a, thla ruk hnuah Varparh Arsi (Venus) kiangah a thlawk tawh tura ngaih a ni a, chuta tang chuan thlawk muang chho tawhin ni a pan dawn ta a ni. He satellite hi Parker Solar Probe tih niin $1.5bn man laia to a ni bawk.

Parker hian hnai set sawtah ni a hel dawn a, Ni bihchiang tura an thawn tawh satellite thlawk hnai ber aiin a let 7 laiin a thlawk hnai dawn. Ni atanga 62,76,426 KM-a hlaah Parker hian ni hi a hel anga, a helna hmun atang hi chuan a sa dawn hem hem khawp mai, 2,500 degrees Fahrenheit (1,371C) lai a ni dawn.

Hetih lai hian Parker Solar Probe hi ropui taka thuam a ni thung a, Ni zir chianna tur khawl tha tak tak a tuiral mai lohna turin inchi 4-a chhah carbon-composite solar shield chu ni lamah a kapparh anga, hei hian satellite tuiral tur a veng dawn a ni, carbon-composite solar shield-in Ni sa a dan hnuah chuan satellite khawl chhung lum zawng chu 38’C vel chauh a ni dawn a ni.

Khawvel atanga Arsi (Star) kan hmuh hnai ber chu Ni (Sun) hi a ni a, hei hi chiang zawka zir tumin NASA chuan khawl a thawnchho leh ta chu a ni a. Kum 2024-ah Parker Solar Probe hian a tum ram thleng tura ngaih a ni.

Ni hi boruak alh lian tak niin danglamna mak tak a nei a, a chhungril aiin a pawn Corona an tih chu a sa zawk daih mai. Hei hi mithiam ten an zirchian theih ngat chuan Star chungchangah mihringin hriatna thuk zawk kan neih theih phah dawn a ni.

Tin, Ni chungchang hi zirchian a ngaihna em em pakhat chu khawvela nunna a awm theih nana thil pawimawh tak a ni a, chutih laiin khawvela thil nung zawng zawng thih vek theihna khawp thahrui nei a ni bawk a, ni chungchang zirchianna hi mihringte tihmakmawh nia ngaiin sum tam tak sengin NASA chuan Parker Solar Probe a kapchhuak ta a ni.

Facebook Comments

Tagged under:

Back to top