Sikeisenah lui hmuhchhuah a ni Featured

 

Tun kar liamtaa khawvel news luahtu lian ber pakhat chu Sikeisen (Planet Mars)-ah lui hmuhchhuah a ni tih hi a ni. July thla tawp lama hetiang news lian Science Journal lamin an han nei pawh hi a fuh hle bawk, a chhan chu kumin July thla hi kum 2003 hnua Mars leh khawvel inhnaih ber a ni a, July thla laihawl phei kha chuan Hrangchhuana (Jupiter) anga engin a lang hial a, a mawi danglam khawp mai.

Ni (Sun) hnaih ber chu Mercury a ni a, Venus-in a dawt, a pathumna chu kan khawvel (Earth) a ni, chumi dawt chiah chu Sikeisen a ni. Scientist ten satellite hmangin ngun takin an thlitlai tawh thin, Mars leilungah pawh robot pahnih an tumtir tawh nghe nghe bawk. An hriat chak ber chu Mars-ah hian nunna a awm em? Tih hi a ni. Nunna awm theih nana thil pawimawh em em pakhat chu ‘tui’ hi a ni a, Mars leilung zirchian pahin tui a awm leh awm loh an zawng zel a, NASA-in an tirh Curiosity rover pawhin Mars-ah hian tui a awm tih chu a hmuchhuak tawh, hetih lai hian heng tui te hi lei hnawng ang lek chauh an nih bakah a vawh em avangin vurah a chang reng bawk a, nunna awm theih nan chuan a bei tham deuh nia ngaih a ni thin.

Tun kar liamta July ni 25 khan European Space Agency-in a kahchhuah Mars Express orbiter chuan Mars chhim tawpa vur khawn lianpui a zirchianna a tarlang a, he vur khawn lianpui hnuaiah hian lui a luang ngei tih an hre ta. He lui hi KM 20 vela thui a ni nghe nghe a, engtiang chiaha thuk nge tih erawh an la sawi thei lo. Hetih lai hian he an thil hmuhchhuah erawh khawvela tui ang chiah nia an hriat thu an puang a ni.

European Space Agency-a Mars Express orbiter enkawltute zinga an hotu lu Italian Astrophysics Prof Roberto Orosei chuan, “Lui lian tak erawh a ni lem lo, a thuk zawng pawh kan hmanrua hian a zuk hre fak thei lo bawk a, a lo berah feet 3 vela thuk a nih rin a ni. Tam lem lo mahse tui kan tih tak tak ang hi a ni a, vur tui luang tam vak lo emaw, lung kara tui lo tling tlemte ang emaw kha chu a ni lo, kan khawvela vur tuiin a siam lui kan tih ang hi a ni kan ti thei awm e,” tiin a sawi.

He thil hmuhchhuah a nih avang hian Science lama mi thiamte chu an hlim hle a, Open University-a thawk Dr Manish Patel chuan, “Hun rei tak ata Mars leilung hi nunna awm theih nana tlak lo niin kan lo ngai thin. Tuna thil hmuhchhuah hi chuan beiseina thar min neihtir ta. Ni Zungzam hlauhawm (Radiation) atanga him a ni tih a hriat a, a awmna hmun te chhut chian phei chuan nunna awm theihna atana hmun tha tak a ni chiang bawk. Nunna a awm ngei em? Tih enfiah nan erawh hun kan la mamawh deuh dawn. Chutih laiin tui hmuh a ni hi a phurawm tak zet a ni,” tiin a sawi.

Kan hriat tam loh avangin kan universe hi engtia zau nge tih pawh ngaihruat thiam a har thin khawp mai. June thla atanga August thla chawhma lam chhungin chiang takin zan lamah thlasik kawng kan hmu thin, kawlkil tawp ve ve thleng a inphan tuak thin, hei hi milky way galaxy a ni a, he milky way galaxy chhungah hian ni leh a heltu planet te chu kan kual ve laih laih a, kan vir kualna milky way galaxy hi kan universe-ah chuan a te pawl a la ni zui. Hubble telescope-in a hmuh phak china galaxy a chhut dan chuan, kan hmuh phak chinah hian galaxy vaibelchhe sangkhat chuang a awm a nih chu.

Hetiang khawpa lian universe-ah hian keini khawvela chengte chauh hi thil nung kan ni em? Tih hi mithiamte zawhna a ni a, tuman kan chhang thei lo, hmun dangah nunna a awm tih hmuhchhuah a la nih miau loh vang a ni a, tunah chuan rinthu mai chauh a la ni e. Hetiang a nih avang hian tuna Mars-a tui an han hmuchhuak hi khawvel dengchhuak chanchinthar lian tak a ni chiang mai. Nunna han tih hian mihring anga kal ut ut leh fing tak ang chi erawh an beisei lo, heng kan hmuh tham loh thilnung bacteria te leh tuia cheng chi thilnung tereuh te te te a awm hlauh takin tiin khawvel mithiam leh company lian ber ber te chuan Mars lam an hawi thup dawn ta a ni.

Facebook Comments

Tagged under:

Back to top